Anna Magnea

2003-05-30T00:39:00.000Z

Nú ætla ég að segja þessu lokið í bili. Ætla að láta þetta allt saman frá mér og snúa mér að öðrum verkum. Ekki seinna vænna þ.s. ég er að byrja á enn einu námskeiði á mánudaginn. Vonast til að sjá sem flest ykkar þar. Ef ekki þá þakka ég fyrir samveruna og óska ykkur alls hins besta. Vinnuna mína má sjá hér.

2003-05-26T14:41:00.000Z

Jæja, í dag ætlum við að reyna að ljúka þessum blessaða vef okkar. Við verðum bara að fara að láta þetta frá okkur og einbeita okkur að öðrum hlutum - þó aldrei finnist manni verkin fullunnin. Er búin að vera sveitt að fara yfir eins og 200 próf og vinnubækur og þarf að snúa mér að öðrum námskeiðum, vitnisburði og fleiri. Get ekki haft svona mörg járn í eldinum í einu. Fer á tónleika á eftir í Tónlistarskólanum að hlusta á afkvæmin spila. Ætla svo til Elísabetar. Við skulum ljúka þessu í kvöld!! Þá er að græja skilasíðuna á morgun og skila af sér draslinu.

2003-05-22T12:03:00.000Z

Nú er það svart!!! Tölvan mín hefur verið að stríða mér undanfarnar vikur. Hún hefur tekið uppá því að kveikja ekki á sér, svona eins og eitthvert sambandsleysi sé í rafmagninu. Þar sem ég get ekki lifað án tölvunnar hef ég bara reynt að strúka henni aðeins, slökkt og kveikt nokkrum sinnum og hún hefur á endanum tekið aftur við sér. Ég hef ekki viljað skila henni inn vegna þess að ég get ekki lifað án hennar i nokkra klukkutima, hvað þá daga á svona álagstímum eins og núna. En í morgun bara vildi hún alls ekki fara aftur í gang. Hún er annað hvort að mótmæla of mikilli notkun eða bara komin á breytingaskeið greyið, nema hvoru tveggja sé. Ég gat því ekki komist hjá því lengur að láta hana í viðgerð. M'er var lofað flýtiþjónustu og lifi í von um að fá hana aftur á morgun (er það ekki mikil bjartsýni?). Hún valdi s.s. besta tímann, ég ætlaði að klára vefinn umhelgina og skila þessu dóti af mér og er líka á kafi í námsmati og prófum og öllu saman. Hjálp!!! Held ég verði bara að fá mér einhverjar góðar töflur. Vonum það besta. Væri það samt ekki týpíst að allt færi í steik og ég gæti ekki klárað vefinn eftir allt sem maður er búinn að leggja á sig?

2003-05-17T00:10:00.000Z

Þá er komið miðnætti á föstudegi og við búnar að sitja við og reyna að koma restinni út. Ég hef verið að ljúka gagnvirku verkefnunum í vikunni og Elísabet hefur verið að koma upp krækjusíðu o.fl. Við þóttumst náttúrulega ætla að ljúka gagnvirku síðunni í kvöld, en það gekk ekki eftir frekar en fyrri daginn. Við duttum í það að hanna litlar mydir fyrir blönduðu verkefnin og svo er alltaf smá tæknibras að stríða manni annað slagið og tefja fyrir. En þetta er nú allt að skríða saman. Settum 8 verkefni af 14 út í kvöld og hittumst eftir helgi til að klára. Það verður fínt að vera laus við einhver verk þ.s. allir eru á fullu í prófagerð og því sem fylgir þessum árstíma í okkar starfi. Við erum ekki alveg vissar um að þetta sé í takt við það sem ætlast var til - en við munum í það minnsta hafa mikil not af því sjálfar í okkar skóla.

2003-05-11T16:59:00.000Z

Jæja, þá erum við enn og aftur búnar að sitja sveittar í allan dag við blessaðan vefinn okkar. Þetta er allt að koma. En þetta tekur svo ferlega langan tíma! Maður getur endalaust eytt sér í alls kyns dúllerí og tæknilegt rugl. Vonandi að verkið verði nýtilegt þegar upp er staðið. Það er óþolandi þegar maður eyðir öllum sínum tíma í verk sem reynist ónothæft. Við teljum okkur vera að leysa öll verkefnin sem eftir eru í þessum kennsluvef og vonandi er það fullnægjandi. Annars þarf maður að reyna að bjarga sér fyrir horn á lokasprettinum í miðjum prófum og allt í klessu. Eins og staðan er í augnablikinu er nú ekkert svo ósennilegt að við getum skilað af okkur í lok vikunnar eða fljótlega eftir næstu helgi. Eigum eftir að krækja gagnvirku verkefnin og ákveða endanlega útlit á þeirri síðu. Einnig á eftir að ljúka krækjusíðunni og svo yfirlestri og smá frágangi hér og þar. Það væri nú gaman að fá einhver viðbrögð við þessum ósköpum, við höfum ekki heyrt frá nokkrum manni. Vonandi ekki vegna þess að þetta sé svo mikil hörmung að engin vill segja neitt. Svona lítur Norðurlandavefurinn út í dag.

2003-05-08T09:37:00.000Z

Guði sé lof - ég gleymdi bara einu striki í slóðini.

2003-05-08T09:34:00.000Z

Bíddu nú við - af hverju finnur hú nekki vefinn!

2003-05-08T09:32:00.000Z

Við héldum áfram í fyrrakvöld og ætluðum aldeilis að koma helling í viðbót út. En þetta Dreamweaver system er algjörlega að gera út af við okkur. Hlutirnir virka ekki eins og okkur finnst að þier eigi að virka og það getu gert mann bilaðan! Það skríður allt til og afbakast, stundum vill hún leyfa okkur að setja myndir og stundum ekki, það er ekki hægt að setja layer inní tamplate o.s.fv. Endalausar frústrasjónir. En þetta hlýtur að hafast á endanum. Ekki bætir heldur úr að við erum gjarnan með þrjár tölvur við verkið og þurfum að muna hvar við unnum hvert verk og flytja á milli og vesenast í kringum það. Vann í prófamálum í gærkvöldi (þarf víst líka að sinna vinnunni!) og horfði svo á silfur Egils. Elísabet er komin með flensu og við vitum því ekki hvenær við hittumst aftur en ég vinn þá bara í gagnvirku verkefnunum og hef fleiri tilbúin. Vil fara að koma þessu frá mér og snúa mér að öðrum málum. Ef einhver vill skoða þá lítur Norðurlandavefurinn svona út núna. Þarf víst að fara að kenna - uppáhaldstímann - vefsíðugerð í Frontpage.

2003-05-04T19:49:00.000Z

Gleymdi að taka það fram áðan að það væri afar skemmtilegt ef einhverjir vildu gefa okkur comment á vefinn okkar . Elísabet er með tagboard á sínum vef (ég hef ekki enn lagt í það að hrófla við mínum HTML kóða - þekki eigin takmörk) en einnig gætuð þið sent mér tölvupóst á annam@gardabaer.is.

2003-05-04T19:43:00.000Z

Við sátum í slatta af klukkustundum í dag og settum fleiri síður upp af vefnum okkar. Sá reyndar áðan eina villu í honum, kennslulýsing opnast ekki á réttri síðu.Ef einhverjir hafa áhuga getið þið skoðað Norðurlandavefinn okkar núna (það sem komið er). Núna erum við bara nokkuð sáttar við útlitið, svona miðað við aldur og fyrri störf, maður verður að sníða sér stakk eftir vexti - ekki satt? Á morgun og þriðjudag ætlum við svo að henda út hinum textasíðunum um hvert Norðurlandana, vefleiðangrinum um bæklingagerðina, útlitinu á gagnvirku verkefnasíðunni og hinu sem tilbúið er. Hvað svosem öðrum finnst verður þessi vefur mikið nýttur af okkur í Hofsstaðaskóla, enda sniðinn að okkar aðstæðum og kennsluáætlun.

Komst að því áðan að einhverjir fjölskyldumeðlimir eru að fylgjast með blogginu mínu. Kom mér verulega á óvart. Við erum nú ekki beint "krumpufjölskylda" (þ.e. fjölskylda sem er mikið saman og í miklu sambandi), hitti mitt fólk álíka oft og ég hitti ykkur í innilotum í KHÍ. Það er samt gaman að vita að einhver hefur áhuga á því sem maður er að gera og fylgist með manni á þennan hátt. Ég væri reyndar mjög ánægð ef fleiri sem maður þekkir og vill halda einhverju sambandi við myndu blogga, eins og mér skilst að sumir vinahópar geri, þá gæti maður haft alla hjá sér í tölvunni og fylgst með þeim án þess að það tæki mikinn tíma. Mér finnst svo leiðinlegt að tala í síma og ekki er ég dugleg í heimsóknum heldur. Maður hunskast ekki til að heimsækja fólk í nútímanum nema þegar það er skipulagt sérstaklega, afmæli eða stórhátíðir, saumaklúbbur o.þ.h.

2003-05-03T20:13:00.000Z

Var aðeins að kíkja á bloggið - enn og aftur. Finnst orðið allt of skemmtilegt að lesa bloggið hjá hópnum. Það verður hálfgerður söknuður þegar námskeiðinu lýkur að fylgjast ekki lengur með því. En kannski bloggar maður áfram þó svo að námskeiðið sé búið. Ég reyni að gera þetta svolítið skipulega, les oft þessa sem ég kannast best við, svona þegar ég á 5 mínútur aflögu, svo tek ég reglulega alla og byrja til skiptis frá endunum og reyni að lesa að miðju. Skoðaði áðan verkefnið sem sonur hennar Kristínar Steinars tók þátt í í skólanum. Gaman að sjá samanburðinn á unglingunum, sumt kemur á óvart í niðurstöðum þeirra. Sá líka að Ingibjörg er að fara á golfnámskeið. Hún segir reyndar að það sé hjá Önnu Dís en ætli hún sé ekki að meina hjá Önnu Díu sem vinnur með mér og með okkur hér í þessu námi. Ég fór á svona námskeið hjá henni fyrir 2 árum og fannst mjög gaman og ætla einmitt að skella mér aftur núna, sennilega með slatta af fjölskyldumeðlimum.

Ég var aftur í dag í innilotu í Kennaraháskólanum í Námskrárfræðum. Mér fannst enn meira gaman en í gær. Var meira að segja nokkuð virk (s.s. sígasprandi!). Þetta er svolítið eins og þegar maður fer í bíó og er búinn að heyra að myndin sé frábær og hlakkar mikið til, þá verður maður alltaf fyrir vonbrigðum. Ég þurfti hins vegar að "neyða" sjálfa mig til þess að fara á þetta námskeið vegna þess að ég var svo sannfærð um að það væri drepleiðinlegt, eins og allmörgum finnst námskrárvinna í skólum vera. En þetta kom mér skemmtilega á óvart og ég skemmti´mér afar vel og hlakka til að lesa mér til og pæla aðeins í þessu. Var eiginlega búin að ákveða að halda ekki áfram í náminu mínu, af ýmsum ástæðum (er á tveggja ára braut). En nú finnst mér það vera hin mesta firra. Auðvitað hunskast ég til að ljúka þessu. Kannski er þetta líka bara spurningin um að það tekur mann tíma að átta sig á hvað felst í framhaldsnáminu og ná "takti" í því. Þetta er óneitanlega allt öðruvísi nám en maður hefur verið í og forsendurnar sem maður hefur til að kljást við það líka öðruvísi. Ætla að hvíla mig í kvöld, fæ kannski gesti til að spila við okkur. Við fengum Catan spilið í jólagjöf og finnst það svaka skemmtilegt spil. Ég spila nokkuð og á mörg af þessum spilum sem komið hafa út síðustu árin og finnst Catan sérlega gott spil. Ef ykkur finnst gaman að spila hvet ég ykkur til að prófa það. Á morgun ætlum við Elísabet að halda áfram í okkar vinnu.

2003-05-02T18:11:00.000Z

Var í allan dag á námskeiði í Kennó í námskrárfræðum. Það var nú mun betra en ég átti von á. Er ekki alveg þessi "námskrártýpa" en auðvitað er þetta alveg bráðnauðsynlegt fyrir alla kennara að hafa eitthvert vit á. Sýnist að vinnukröfurnar séu nokkuð "eðlilegar" miðað við einingafjölda og að þetta verði nú ekki svo leiðinlegt efni að kynna sér nánar þegar upp er staðið. Það eru líka ýmsir líflegir og ákveðnir´einstaklngar í hópnum og þó nokkrar umræður. Þarna eru líka flestir af minni námsbraut og það er gaman að rekast á það fólk aftur. Er nú samt frekar lúin eftir daginn þ.s. ég varð andvaka í nótt. Gat alls ekki sofnað og rauk á fætur um miðnætti og lagðist í að lesa blogg og senda einhverja tölvupósta í einhverjum ham. Þoli illa að missa svefn - verð að vinna það upp í kvöld ef ég á ekki að vera meðvitundarlaus á morgun.

2003-05-02T00:33:00.000Z

Fljótt skipast veður á lofti. Núna erum við ekki nógu ánægðar með vefinn okkar. Við erum svo vitlausar í vefhönnun að eftir að hafa eytt heilum degi í að hanna borða fyrir vefinn og öðrum í að fá aðstoð við að setja hann inn í template o.þ.h. þá er þetta samt hálfgert klúður. Við vorum víst ekki með vefliti og því ekki hægt að láta hann flæða alla leið yfir skjáinn og borðinn er of stuttur að neðanverðu líka. Þá prófuðum við að hafa litaðan bakgrunn til að sjá hvort það væri eitthvað betra en það var ekki nógu smekklegt. Sennilega látum við þetta nú bara vera svona samt, það eru nú ýmsar hörmungar að finna á netinu og þetta er nú ekkert voðalegt, en það væri gaman ef við gætum lagað þetta en það er víst svo mikið mál. Yrðum sennilega að byrja aftur frá grunni. Og eins og aðrir hafa sagt á þessum vettvangi þá er óþólandi hvað mikill tími fer í eitthvert útlitsrugl í stað innihalds - maður verður bara að hemja sig í hégómanum. Ég verð í Kennó á morgun á námskeiði í Námskrárfræðum. Það er u.þ.b. það lítt áhugaverðasta í veröldinni í mínum huga, allavega á þessum tímapunkti, vonandi kemur námskeiðið mér á óvart og ég uppgötva að mér finnist námskrárfræði og námsskárgerð einstaklega skemmtilegt fyrirbæri. Vonandi verður eitthvert ykkar með mér, það ættu sennilega að vera einhverjir sem eru á minni námsbraut þ.e. kennslufræði og námsefnisgerð. Alltaf gaman að hitta fólkið - en veit ekki hvort sellurnar mínar eru tilbúnar að taka á móti meiri upplýsingum.

2003-05-01T13:42:00.000Z

Hér sit ég í vinnuherberginu heima hjá Elísabetu. Við erum búnar að sitja við í nokkra tíma og koma vefnum okkar og undirsíðum út á netið. Fyrsta síðan er "tilbúin" og nú er að koma þessu efni sem við erum tilbúnar með inn á undirsíðurnar. Við erum afar ánægðar með árangurinn og finnst þetta bara nokkuð fínt hjá okkur, allavega nógu fínt fyrir mig. Elísabet ætlar að skreppa núna með litla snúð í ungbarnanudd og ég ætla að vinna hér á meðan og svo ætlum við að halda áfram á eftir. Þetta hefst allt saman. Vonandi er þetta nógu gott. Ætla nú ekki að setja slóðina inn núna - kannski seinna í dag.

Fór líka áðan með pjakkana mína þrjá að fá hamstra. Þeir eru óðir í gæludýr (eins og ég var reyndar sjálf á þeirra aldri) en eru svo ólanssamir að búa í blokk auk þess að eiga foreldra með alls kyns dýraofnæmi. Ég ákvað samt fyrir nokkrum vikum að þeir yrðu bara að fá einhver dýr til að fá útrás fyrir þessari nærandi hvöt sem í þeim býr. Ákvað að prófa hamstur. Þeir eru þolanlegir í blokk og ekki mjög hærðir. Var svo lánsöm að hafa ynidslega nemendur sem vilja allt gera fyrir kennarann sinn. Einn gaf mér þetta fína búr á tveimur hæðum, með húsi og klósetti, vatnsbrúsa og öllum græjum. Annar gaf mér þrjá hamstra. Það er s.s. einn hamstur á son. Þeir heita Ormur, Stormur og Gormur en það voru "gælunöfn" strákanna minna þegar þeir voru litlir og púki var í þeim.

Það kom nú sitthvað í ljós í gær varðandi starfsaðstæður mínar næsta vetur. Held áð nú sé rétti tíminn til að skipta up starfsvettvang. Ætla að leggjast yfir atvinnuauglýsingarnar á næstu dögum. Ef einhver veit um góða stöðu í skemmtilegum skóla handa mér látið mig endilega vita!

2003-04-29T13:07:00.000Z

Elísabet eyddi stórum hluta dagsins í gær í það að ræða við "tæknilega ráðgjafann" okkar og koma grunnsíðu vefsins okkar á koppinn með krækjum og tilheyrandi. Ég þurfti því miður að vinna. En ég vann aðeins í gærkvöldi og er komin með eitt gagnvirkt verkefni til viðbótar. Þetta smá mjakast allt saman. Hún bauð mér í mat áðan og sennilega ætlum við að hafa matar og vinnukvöld í kvöld. Milli þess sem við hnoðrumst með son hennar en hann er svo ómótstæðilegt krútt að tölvan og námsbækurnar hafa sára lítið aðdráttarafl þegar hann er á svæðinu. Hann er svo félagslyndur og síbrosandi. Það sama verður víst ekki það sama sagt um mig þessa dagana!!

2003-04-27T18:34:00.000Z

Við höfum verið duglegar síðustu daga. Hittumst í gær og vorum þá komnar með lungað af efninu á vefinn. Settumst niður í gær og teiknuðum vefinn aftur upp - hvernig hann á að líta út og hvað á að opnast hvar og tengjast hvert og allt það. Í dag ákváðum við að þræla okkur í gegnum það að hanna haus og hliðarborða. Það gekk nú á ýmsu með okkar takmörkuðu kunnáttu í Fireworks en hafðist á endanum. Erum bara þokkalega sáttar. Elísabet hringdi í vinkonu sína sem er nokkuð klár í Dreamweaver og ætlar að fá hana til að hjálpa okkur aðeins af stað við uppsetninguna svo þetta klúðrist ekki allt saman hjá okkur. Gott að ná þessu örugglega réttu í byrjun svo allt fari ekki í klessu og við þurfum að byrja aftur frá grunni. Ég fékk reyndar smá sjokk áðan þegar ég fékk tölvupóst frá einhverjum sem á að kenna mér á drepleiðinlega sumarnámskeiði sem ég valdi. Ég á víst að mæta í Kennó næsta föstudag! Sé þetta ekki alveg ganga upp hjá mér að reyna að klambra þessu námskeiði saman, lifa af prófatörn og byrja líka á einhverju öðru námskeiði með tilheyrandi álagi! Hjálp!!!! Þarf greinilega að fá mér einhverjar töflur sem gera það að verkum að ég þarf ekki að sofa. Best að fara ða koma sér heim að sinna fjölskyldunni, er búin að vera hér lunguð úr deginum.

2003-04-24T18:41:00.000Z

Hef verið hræðilega löt síðustu daga. En við Elísabet eyddum stórum hluta dagsins í dag í að vinna að verkinu. Tókum okkur hlé inn á milli og "kjöftuðum" við Litla-Björn (son hennar) og fórum með hann í göngutúr til að fá loft í lungun og hressa uppá heilasellurnar. Erum komnar vel á veg með sjálft efnið. Við ætlum að vinna´aðeins áfram í sitt hvoru lagi og stefnum að því að hittast aftur á laugardaginn og vera þá tilbúnar að mestu til að fara í "hönnunarmál" þ.e. að ákveða nánar hvernig vefurinn á að líta út og snúa okkur að því að vefa upp efnið. Sáum reyndar bréfið frá Salvöru þ.s. við fáum frest til 1. júni til að ljúka öllum verkefnum. En þ.s. prófalota og mesta vinnuálagið hjá okkur umsjónarkennurum er eftir 15. maí stefnum við að því að vera búnar í allra síðasta lagi þá. Vonandi gengur það eftir. Ætla að sitja við í kvöld (Ég skal!! Engar flóttaleiðir!) og koma einhverju á koppinn til viðbótar. Að svo stöddu er vefurinn byggður upp þannig að það verður kennslulýsing (á öllu verkinu um Norðurlönd), textaumfjöllun um hvert land, sennilega 12-14 gagnvirk verkefni, vefleiðangur um bæklingagerð um Norðurlöndin, verkefna og krækjasíða þ.s. krækt er á ýmis verkefni sem við höfum fundið og kennarasíða þ.s. hægt verður t.d. að prenta út eyðublöð fyrir námsmat o.fl.

2003-04-22T17:03:00.000Z

Þá er maður byrjaður að vinna aftur. Alltaf gaman að hitta krakkana. Hef lítið unnið í verkefninu okkar síðustu daga, hef verið önnum kafinn við að elda ofaní stórfjölskylduna, fara í fermingarveislu og vinna önnur verk fyrir vinnuna eins og prófagerð og yfirferð kjörbókarritgerða. Við Elísabet ætluðum að hittast í kvöld og vinna saman en bóndinn hennar var svo óforskammaður að eiga afmæli og hún ætlar því að sinna fjölskyldunni í staðinn. Gott hjá henni. Ég ætla að reyna að vinda mér eitthvað í verkið hér í kvöld samt sem áður og verð þá kannski komin meira áleiðis þegar við hittumst á morgun eða hinn.

2003-04-16T21:50:00.000Z

Ég lagðist í áframhaldandi vinnu í gærkvöldi og í dag. Lagðist í að rifja upp Hot potatoes en ég hef ekki notað það í vetur, hef bara ekki haft tíma fyrir gæluverkefnin éftir að ég skellti mér í námið. Sat við í nokkra tíma í dag og er komin með frumútgáfu að nokkrum verkefnum og er að vinna í kennslulýsingunni. Fór svo og lá í tvo tíma í stólnum hjá tannlækninum. Er að fá postulínstönn. Varð fyrir þeirri skemmtilegu lífsreynslu í fyrra að bíta í súkkulaði eða eitthvað og þá kom bara heil framtönn með. Það er sjokkerandi tilfinning að sjá framtönnina í súkkulaðistykki og ekki skánaði það við að líta í spegil! Maður er ótrúlega skrítinn með gat þ.s. framtönn var áður. Þetta er nú meira mál en ég hélt. Hélt hún ætlaði aldrei að verða búin að slípa þetta allt til. Hún er greinilega vandvirk. Fór svo aðeins að versla fermingargjöf. Keypti stafræna myndavél. Vissi ekkert hvað ég var að versla, spurði bara manninn í búðinni hvort hann gæti mælt með einhverri vél á þessu verðbili og keypti það sem hann sagði. Heilsaði uppá Elísabetu og gaf henni smá afmælisgjöf. Við vorum sammála því hversu erfitt það er að geta ekki sökkt sér í marga tíma fyrir framan tölvuna. Hún er nú verri en ég með þetta - hún sat nú iðulega kengbogin langt fram á nótt hér áður. En nú er hún með lítið barn sem heimtar brjóst og bleiu, svo þetta er ekki eins einfalt. Mér finnst þetta vera þannig að það tekur svona klukkutíma að komast vel í gang og ef vel gengur kemst maður þá í svona "flow" ástand (ægilega fínt orð sem mikið var rætt um á námskeiðinu sem ég var á fyrir áramót) og lítur ekki upp í 2-3 tíma. Þannig að ef eitthvað á að ganga hjá mér verð ég að fá 3 tíma í friði. Maðurinn minn nældi sér í smá aukavinnu um páskana og verður því lítið heima, svo þarf ég víst að halda eins og tvö matarboð fyrir stórfjölskylduna. Er ekki alveg í stuði fyrir matarboð. Gat aftur frestað ferðinni í Fjarðarkaup þ.s. þeir eru svo vinsamlegir að hafa opið á morgun. En þá barasta verð ég að hunskast í páskaverslunarleiðangur. Er aftur með næturgest og þeir félagarnir eru í algjöru galsakasti og ætla greinilega ekki að fara að sofa. Þeir fengu myndband í stað páskaeggs og við sátum áðan að horfa á Lilo & Stitch. Ég er svo seinþroska að mér finnst svo gaman að barnamyndum - fer með þeim á allar barnamyndir í bíó líka. Nú ætla ég að vinda mér í smá vinnu til viðbótar - kannski að ég skelli mér núna í að semja enskukönnun í stað vefefnis. Koma einhverjum "smáverkum" frá. Við Elísabet ætlum að reyna að vinna eftir aðstæðum hver í sínu lagi´á milli matarboða, fermingarveislna og annara verkefna og hittast á næstu dögum þegar aðstæður leyfa og bera saman bækur okkar. Þetta hlýtur allt að hafast, ekki satt?

2003-04-15T20:40:00.000Z

Hvað skyldi ég nú hafa gert? Það kemur allt "bold" eftir krækjunni á Kristínu Steinars. Er búin að skoða þetta aftur í edit og sé ekkert athugavert. Ég sem er búin að vera svo sátt við hvað lítið hefur farið úrskeiðis í þessu blogg standi mínu miðað við hryllingssögur sumra. Ætla að sjá hvort þetta kemur líka bold. Kannski finnst tölvunni bara allt miklu merkilegra sem ég er að segja núna!

2003-04-15T20:30:00.000Z

Nú er ég sest aftur við verkið. Hef einhverjar fantasíur um að vera langt komin með allt innihald í lok páskafrís svo við getum þá eytt orkunni í að spá í útlit og vefnað. Er búin að vera að skanna bloggið hjá fólki í dag og síðustu daga. Flestir virðast hafa vit á því að líta á páskafrí sem páskafrí, hvíla sig og njóta þess að vera til s.s. lítið um blogg. Ég hef því miður eiginlega bara eina rás (eða er svolítið manísk í eðli mínu) og vil nota tækifærið og sökkva mér í þessi tímafreku verk í páskafríinu þegar ég þarf ekki líka að vera að spá í kennslu og öllu því sem því fylgir, sækjandi og keyrandi börn á æfingar út og suður o.s.fv. Ég á svolítið erfitt með að demba mér í eitthvað svona tímafrekt og skemmtilegt meðan ég þarf að sinna öðru líka þ.s. ég´gleymi mér og lít ekki upp og sinni ekki nógu vel "öllum hinum" verkunum á meðan og þoli alls ekki að gera hluti illa. Þetta hefur svolítið háð mér í þessu námi mínu í Kennó. Það er togað í mann úr of mörgum áttum og mér finnst ég eiginlega ekki sinna neinu af viti. En svona er þetta bara - maður er víst orðinn fullorðinn! Ég las bloggið hennar Kristínar Steinars og vil endilega hvetja fólk til að tjá sig eins og hún um hennar hugleiðingar varðandi námið og kennsluna o.fl. Það voru heilmiklar umræður um þessi mál í partíinu hjá henni og ég held að það væri afar gott fyrir Salvöru og aðra skipuleggjendur á svona námskeiðum að fá að vita hvað fólk vill og hvað því finnst og hvað má betur fara. Í það minnsta myndi ég vilja heyra það. Við erum öll kennarar og viljum öll standa okkur vel í því og gott að fá ábendingar. Ég hef oft velt því fyrir mér hversu gífurlega erfitt það er að skipuleggja nám fyrir svona hóp, þ.e. fullorðna reynslumikla einstaklinga. Ég get t.d. nokkurn veginn gengið út frá því að þegar ég fer að leggja inn X - efni í bekknum mínum er það alveg nýtt fyrir allfelstum, en er þó erfitt fyrir mig að kenna við allra hæfi. Hvað þá í svona fullorðinsfræðslu þ.s. bakgrunnurinn er eins ólíkur og hjá okkur. Það er alveg sama nánast um hvað þú ert að fjalla - sumir vita e.t.v. meira en þú um efnið en aðrir koma af fjöllum og allt þar á milli. Sjáum bara þessi vefsíðugerðarmál - það er greinilegt að margir í hópnum hafa töluverða reynslu og hrista þetta fram úr erminni, en aðrir hafa aldrei komið nálægt þessu og finnst mjög erfitt. Eitt af því sem kom upp í partíinu man ég var sú hugmynd hvort ekki væri ráð að getuskipta hópnum. Taka þessa sem eru á byrjunarreit/stutt komnir saman og fara vel í grunninn með þeim og láta þá "sjóaðri" vera saman og fara þá í flóknari atriði og fítusa með þeim. Ætli ég sé ekki týpískur meðalnemandi í þessum hópi - veit svolítið og hef aðeins snert á þessu áður - en mér finnst þetta samt nógu fjandi erfitt og er sammála Kristínu að gott hefði verið að fá meiri grunnkennslu í upphafi.

2003-04-15T11:44:00.000Z

Við stöllur erum hér staddar í Hofsstaðaskóla og erum búnar að vera vinna í nokkra tíma. Við hittumst í gær og teiknuðum upp okkar hugmyndir um vefinn okkar. Við vorum ósköp brattar og ánægðar með hugmyndina og tilbúnar í slaginn. Svo hringdi Elísabet í mig í gærkvöldi og þá kom í ljós að hún hafði fundið fullt af efni á netinu um Norðurlöndin - ekki ósvipað því sem við vorum að spá í. H'un var að sýna mér það áðan. Það var nú svolítill bömmer - alla vega í fyrstu. Við veltum lengi fyrir okkur hvað skyldi gera. Elísabet peppaði mig svo upp og við ákvaðum að halda okkur bara við það sem við vorum að pæla í. Margt af þessu efni sem um ræðir er unnið af nemendum´í Kennaraháskólanum og er "óstöðugt" og hverfur sennilega þegar þeir nemendur hætta námi, annað er unnið af krökkum og er ekki kannski eins og við viljum hafa. Þannig að við ætlum bara að einbeita okkur að því að´búa til pakka fyrir okkar skóla sem við höfum aðgang og umráð yfir og getum bætt inná og breytt eftir þörfum. En verkið er óneitanlega ekki eins spennandi eftir að þetta kom í ljós. Við höfum svo bara góða heimildaskrá og krækjur á allt þetta sem við fundum. Við erum aðeins byrjaðar að vinna. Erum reyndar að vinna í því sem mér finnst óheyrilega leiðinlegt - þ.e. textasamningu. Þarf að komast í gegnum þar svo ég geti snúið mér að því sem mér finnst skemmtilegra. Sjáum hvað setur. Vonandi þurfum við ekki að hætta við allt verkið.

2003-04-13T18:12:00.000Z

Þá er ég aftur sest við tölvuna. Er bara í sæmilegu stuði eftir innilotuna - kom batteríunum aftur í gang. ÉG er líka best undir pressu og þ.s. í ljós koma að mikið verk er framundan þá er eins gott að bretta upp ermar. Maður vill nú standa sig. Í gærkvöldi sat ég með annað augað við sjónvarpið og hitt á fartölvunni sem ég sat með í fanginu í Lazy-boy stólnum mínum. Það er oft ansi gott að eiga fartölvu. Ég lagaði útlitið á þeim síðum sem ég er búin með eftir að Salvör sýndi okkur hvernig ég ætti að gera ákveðna hluti sem ég fann ekki út sjálf. Ég skil ekki núna hvernig ég gat farið framhjá þessari einföldu vitneskju. En svona getur þetta verið. Fór líka að safna mér fleiri myndum og vinna þær inná vefinn. Svona dúllerí. Skrapp svo áðan upp í skóla að ná mér í námsefnið um Norðurlöndin til að nota við næsta verkefni. Reyndar líka ensku bækur til að gera próf´og stafla af kjörbókarritgerðum sem ég ætla að fara yfir um páskana. Elísabet baðst undan því að vinna með mér í dag. Hún var svolítið búin á því greyið eftir að hafa verið heima í 6 vikur með ungabarn í rólegheitum og svo allt í einu 2 daga námskeið og svo partý á eftir báða dagana. Við ætlum að vinda okkur í fyrsta "vinnufund" á morgun. Hugstorma um skipulagið og leggja fyrstu drög að því. Ætla núna að reyna að senda lagfærðar síðurnar mínar út. Ef einhverjir hafa áhuga á því að skoða hvað ég hef verið að gera þ.s. slóðin mín er ein af þeim sem ekki er virk á námskeiðssíðunni þá er síðan mín hér.

2003-04-12T12:37:00.000Z

Ég fékk svo mikinn innblástur í innilotunni að ég get ekki hætt að skrifa. Þarf að tjá mig svolítið meira í dag. Þó svo að Eyþór og Þorkell vilji meina að við Elísabet skrifum allt of mikið á síðurnar okkar. Svona er nú stundum munurinn á kynjunum. Mér finnst líka svolítið skemmtilega að vita það að einhver les þetta bull í manni. Mér finnst stundum svolítið skrítið að babbla bara við sjálfa mig. Ég hlakka til að ráðast á verkefnin um páskana með Elísabetu. Ég er svo lánsöm að hafa hana með mér, við erum svo ágætar saman, vegum hvort aðra upp og erum báðar svolítið "ofvirkar" á köflum. Það er áreiðanlega stundum svolítið ský fyrir ofan okkur þegar við förum á flug saman (það rýkur semsagt úr hausnum á okkur). Það er svo ágætt að hafa einhvern sem manni finnst gott að vinna með. Mér er farið að þykja svo vænt um tímann minn að ég nenni ekki að eyða honum í samstarf sem engu skilar eða þar sem ég enda með því að gera flest sjálf hvort sem er. Ef ég fæ ekki að vinna með fólki sem leggur jafnt að mörkum og tekur á sig jafna ábyrgð á verkinu þá vil ég bara fá að vinna ein. Þetta er stundum orðið dálítið vandamál í vinnunni þ.s. allt er farið að ganga út á samvinnu og samræmingu og maður situr endalausa fundi sem ekkert kemur út úr og allir sitja passívir og ekkert gerist.

Ég ætla nú að fara að hætta þessu og snúa mér aftur að fjölskyldunni. Við vorum með næturgest í nótt, vinur tvíburanna gisti hjá okkur. Það virðist vera orðið nokkuð eftirsótt að vera hér hjá okkur og gista, einkum á föstudögum. Þá er fjölskyldubíódagur á heimilinu. Það er nú ekki merkilegri viðburður en það að öll fjölskyldan (nema þá sjaldan að ég er lokkuð út eins og í gær) situr saman að horfa á barnamyndina í sjónvarpinu og borðar popp. Þetta finnst sonum mínum (og vinum þeirra að því er virðist) afar merkilegur hlutur. Það sýnir manni að það eru ekki stóru dýru viðburðirnir sem krökkum finnst merkilegastir. Þetta kostar ekkert nema eins og tvo pakka af Orville poppi. Annars virðast vinir þeirra vera hér mjög mikið. Við höfum lagt mjög mikið upp úr því að allir vinir þeirra séu alltaf velkomnir. Þetta sé heimili þeirra og vinir þeirra séu jafn velkomnir og okkar. Og þá allir - ekki bara einn inni í einu og eitthvað svoleiðis bull! Ég hef lært það í mínu starfi að ekkert er eins mikilvægt í lífinu og þessi félagslegi þáttur og vinskapur og félagsleg færni sé öllu öðru dýrmætara. Það er líka svo erfitt að kenna krökkum hana sem einhverra hluta vegna búa ekki yfir henni. Ég er svo sæl með það að þeir eigi þessa indælu stráka að vinum og þeim finnist gott að vera hér. Það er oft ansi fjörugt þegar 5-6-7- drengir eru samankomnir í handbolta inní herbergi - en við látum okkur bara hafa það. Það er líka svo merkilegt að ég varð svo miklu betri kennari eftir að ég eignaðist alla þessa drengi. Þeir eru af fjörugri gerðinni og núna skil ég miklu betur og er miklu umburðarlyndari gagnvart þessum kraftmiklu krefjandi drengjum sem maður kennir og nær miklu betri árangri fyrir vikið. Ég ætla með hersinguna í sund á eftir í góða veðrinu og reyni svo kannski að hafa eitthvað gott í matinn. Á sunnudagsmorgnum fara þeir með pabba sínum til frænda síns og þeir gera alls kyns skemmtilega hluti saman, horfa á klassískar bíómyndir, fara að veiða, skreppa í Heiðmörk o.þ.h. Þessi hefð hefur verið núna í 5 ár, á hverjum sunnudegi. Helgin hjá þeim er semsagt skilgreind sem bíódagur, nammidagur og Péturs dagur. Á meðan þeir skemmta sér á sunnudögum hef ég farið´í vinnuna eða núna í vetur sinnt náminu.

2003-04-12T12:07:00.000Z

Nú er ég búin í síðustu innilotunni. Margir eru nú svo óheppnir að þurfa að vera inni í Kennaraháskóla í þessu dýrindisveðri. Ég lærði nú kannski ekki svo ýkja mikið - en eitthvað samt. Skemmtilegast er þó alltaf að hitta fólkið. Það er svo margt áhugavert og skemmtilegt fólk í þessum kúrs. Það var líka mjög indælt af Kristínu að bjóða oikkur heim - þá gafst manni færi á að spjalla meira. Verst að nú þegar ég er aðeins farin að átta mig á hver er hvað þá hitti ég fólkið sennilega ekkert aftur. Kannski verða einhverjir með mér á öðrum námskeiðum. Það er svo skemmtilegt hvað fólkið kemur úr öllum áttum, af öllum skólastigum, á alls kyns aldri og með ólík áhugasvið. Svona þverskurður af samfélaginu a.m.k. kennarasamfélaginu. Það kemur mér líka skemmtilega á óvart hvað er mikið af "þroskuðum" konum, sem eru tæknivæddar og opnar fyrir svona nýjungum og skella sér bara í tölvunám. Maður hefur stundum óttast það að eldast í starfi vegna þess að maður sér allt fg marga kennara staðna og verða hreint ótrúlega leiðinlegir og geðstirðir og vilja sko ekkert leggja á sig til að læra eitthvað nýtt. Til hvers þá að vera að þessu? Vonandi hef ég vit á því að hætta þegar þetta er farið að vera einhæft og leiðinlegt. Maður á ekki að kenna börnum ef manni finnst það leiðinlegt. Huguriin ber mann hálfa leið í þessu starfi.

Ég var svo undrandi í gær hvað sumir eru duglegir að lesa bloggið hjá hinum. Og enn meira undrandi á hversu mikið þeir mundu. Ekki allir með "alsheimer medium" eins og ég. Ég ákvað það í morgun að leggjast í lestur á bloggum og athugun á vinnu annara. Hef svosem gert það svolítið áður - en ekki hjá öllum - aðallega þessum sem ég kannast við. Mér finnst slæmt að það sé ekki búið að laga tengingarnar hjá öllum og því ekki hægt að skoða hjá nærri því öllum. Vonandi kippir Salvör því fljótlega í liðinn. Ég sá að ýmsir eru að gera áhugaverða hluti. Get t.d. nýtt mér verkefni sem Gerður gerði um safnafræðslu. Við fórum nefnilega í fyrra í óskaplega skemmtilega vorferð með nemendum okkar (í þessum júnídögum sem enginn veit hvað gera skal við). Við fórum með allan árganginn í strætó niður að Landspítala og löbbuðum þaðan um miðborgina og sýndum þeim merka staði og byggingar. Svo keyptum við ís á Lækjartorgi og tókum þaðan annan strætó í Keiluhöllina og allir fengu pizzu, kók og keiluleik. Við vorum svo heppin með veður og þetta var svo yndisleg ferð. Það er svo gaman að blanda svona saman fræðslu og skemmtun. Við ákváðum því strax í haust að fara aftur í vor og fara þá á safnarölt í miðbænum og svo einhverja svipaða skemmtun á eftir. Ég vissi ekki að það væri til svona safnahandbók eins og Gerður er að nota í sínu verkefni. Mér fannst líka nokkuð smellið verkefnið hennar Kristínar um íslenskar hljómsveitir. Held það geti höfðað mjög til nemenda. Ég er svolítið dottin í vefrallý og þess háttar undanfarið með nemendum mínum og þegar ég spurði þá hvernig vefrallý þeir vildu gera nefndu þeir tónlist.

2003-04-10T13:07:00.000Z

Ég er ´búin að vera hér í Kennaraháskólanum í morgun að læra meira í Fireworks. Við erum fremur fá og ég lærði ýmislegt. Var líka dugleg að skrifa hjá mér svo ég myndi eitthvað núna! Síðast fannst mér ég skilja þetta allt saman en svo fór allt út úr minniskubbnum mínum og ekkert gekk. Nú er Salvör komin og ég þarf að læra meira svo ég geti gert einhvern snilldarvef um páskana.

2003-04-09T14:53:00.000Z

Þá styttist í innilotuna. Fékk dagskrána áðan. Ég sá það eftir að hafa setið við nokkra stund í gær að ég gæti nú ekki gert almennilegan vefleiðangur á þessum tíma sem ég hef fram að innilotu, svona úr því að ég þarf að vinna líka. Ég var komin með hugmynd og var að myndast við þetta, þá sá ég að einhver annar hafði gert vefleiðangur um það sama! Ég gat reyndar ekki opnað síðuna - en hún kom upp í leitinni minni. Þá féllust mér hendur og ég ákvað að ég myndi bara vera fram úr hófi dugleg í páskafríinu - hef svosem ekkert þarfara að gera og gera þetta vel. Ákvað með sjálfri mér að það skipti varla höfuðmáli hvort þetta væri endilega búið akkúrat núna eða ekki. Ef maður skilar bara öllu áður en yfir lýkur. Það er líka fínt að læra aðeins meira áður en maður ræðst í flóknari verkefnin. Það fer svo óskaplega í taugarnar á mér hvað ég kann lítið. Annars verð ég þá bara aðal-tossinn í hópnum og verð "skömmuð" af Salvöru. Það er þá ný reynsla. Aldrei lent í því. Var alltaf ægilega stillt og stabíl í skólanum. Hlakka til að hitta fólkið.

2003-04-08T21:01:00.000Z

Fékk svar hjá Salvöru. Ég er í tómu tjóni - eða þannig. Við eigum að gera kennsluvef og vefleiðangur. Vissi nú reyndar þetta með vefleiðangurinn þegar ég fór að róta í minninu - var alltaf að bíða eftir góðri hugmynd - en hún bara kom ekki og þá datt þessi vitneskja úr minniskubbnum. En ég man ekki eftir að hafa heyrt einu orði minnst á neinn kennslusvef. Er ég kannski með athyglisbrest? Ég ákvað að reyna að sitja við og gera þetta í kvöld og morgun. En náði ekki tengingu heima, svo nú er ég komin í vinnuna. En nú fæ ég enga hugmynd og sé það að þetta er nú svolítið meira mál en mér fannst í fyrstu. Þarf að gefa mér góðan tíma. Ætli við eigum að skila þessu núna? Held ekki endilega. Á ekki bara allt að vera búið í vor? Egóið er í verulegum mínus út af þessu. Eins og það þandist út eftir verkefnið hjá Láru. Nú finnst mér allt svo flott sem hinir eru að gera og ég geti bara ekki með nokkru móti látið nokkurn mann sjá mína vinnu í innilotunni. Fékk líka tölvúpóst um að ég ætti að vera í fyrri ´hópnum - en bað um að vera í seinni. Það verður ansi þungt í vöfum þ.s. þrír stjórnendur hússins eru í fríi, einhverjir eru veikir og enn aðrir eru að fara fyrr í páskafrí! Verð ekki vinsæl og ekki víst að neinn fáist til að kenna fyrir mig. Nú þyrfti ég verulega á ísköldu glasi af kóki að halda. Hætti að drekka kók um áramótin. Er ógurlegur kókisti . En á svona stundum - þegar orku og einbeitingar er þörf - var kókið indælt. Ætla að reyna að vinna eitthvað í málunum. Sjáum hvað ég kemst.

2003-04-07T15:08:00.000Z

Ætli ég sé sú eina sem hef þá tilfinningu að ég eigi allt eftir? Er að spá í að senda Salvöru tölvupóst og spyrjast fyrir um hvort ég ´se eitthvað úti á túni. ´Fór að ræða þetta við Elísabetu og henni leist ekkert á blikuna heldur og fannst að við værum eitthvað að misskilja málin. Erum við tvær svona miklir túnfíflar?

2003-04-03T14:42:00.000Z

Nú er ég tekin aftur við stjórn í bekknum mínum. Það er nú alltaf ósköp gott þótt gaman sé að fá nema. Það er reyndar enn slatti veikur, ætlar engan enda að taka þessi veikindahrina. Þetta er nú ekkert sem eftir er - vika fram að páskafríi og svo einhverjar götóttar vikur þar á eftir og svo próf. Alveg furðulegt hvað þetta kemur manni alltaf á óvart hvað skólaárið líður. Nú hef ég mestar áhyggjur af ´því að ég sé búin að missa af einhverju, eða réttara sagt látið eitthvað fram hjá mér fara og eigi fullt af verkefnum eftir. Var að lesa þessa lýsingu og mér sýnist einhvern veginn að ég eigi þetta barasta mikið til eftir. Er þetta bara misskilningur í mér? Ég hef ekki gert vefleiðangur - en hef gert tvö vefrallý. Hvað er svo þetta með nokkurra síðna kennsluvef? Er það heimasíðan með öllu á eða á ég að vera búin að gera sérstakan nokkurra síðna vef um ákveðið efni? Þarf að gefa mér tíma til að átta mig um helgina. Hlakka til að hitta liðið í innilotunni.

2003-03-31T13:23:00.000Z

Jæja, þá er enn einni helgi lokið. ÉG sat til miðnættis á föstudag við að koma verkefninu hennar Sólveigar á koppinn. Það var ansi gott að vera búinn að koma því frá sér. Svo hef ég, eins og greinilega margir aðrir, verið að velta fyrir mér næsta verkefni - þessari glærukynningu. Var mjög ánægð að fá nánari leiðbeiningar áðan. Salvör er ansi góð með þetta að senda manni upplýsingar. Mér finnst þetta ansi sniðug hugmynd og held það verði mög gaman að prófa að láta taka sig upp og setja saman síðu með þessum hætti. Þarf aðeins að velta mér upp úr því hvað ég get notað í þetta - kannski á maður eitthvað heppilegt. Ég eyddi helginni í að hlaða batteríin og ná upp hvíld. Maður er greinilega að eldast. Ég var eins og draugur alla vikunna eftir Ameríku ferðina. ÉG fór ekki einu sinni úr náttfötunum eða út í búð alla helgina, var bara heima, gekk frá öllu sem ég keypti, réðst á þvottafjallið og tók til. Svo horfði ég á sjónvarpið og svaf og svaf og svaf. Enda er ég allt önnur í dag. Maður verður víst að sætta sig við það að maður getur ekki gengið eins nærri sér og þegar maður var ungur.

Kennaranemarnir mínir ljúka æfingakennslunni á morgun og ég lét þær fær umsögnina sína áðan. Ég hef vanið mig á taka nemana mína í viðtal og láta þau fá skriflega umsögn um frammistöðuna. Held þær hafi verið mjög ánægðar með það. Þetta eru líka úrvals nemar sem ég er með í ár. ÉG hef verið "áskrifandi" af nemum síðustu ár og það er mjög lærdómsríkt. Maður áttar sig á því hvað maður kann mikið án þess að gera sér nokkra grein fyrir því þegar maður horfir á einhvern reyna að kenna sem kann það alls ekki. Öll þesi smáatriði sem maður hefur tileinkað sér án þess að átta sig á því. Annars er ég með fjarnema núna og fékk líka fjarnema í fyrra. Það er hreint ótrúlegt hve miklu munar á því að fá svona "þroskaða" og lífsreynda nema og því að fá 22 ára dagsskólanema. Annars rætist nú úr manni, ég var sjálf svona ósjálfstæður rúmlega tvítugur stelpukjáni sem aldrei hafði komið nálægt börnum þegar ég var í Kennó. En asskoti var erfitt að byrja að kenna!

2003-03-28T14:58:00.000Z

Ég lifði af vikuna - en með naumindum þó. Er mjög eftir mig eftir ferðina og gengur illa að ná upp svefni og hvíld. Fyrstu nóttina heima þurfti ég að rjúka með einn soninn á slysó vegna þess að ég hélt hann væri með heilahristing. Var þar frá 2-4 og svaf svo yfir mig um morguninn. Hann reyndist bara vera með flensu og er hundlasin heima. Nemendur mínir eru búnir að standa sig vel í flensunni líka. Í dag voru 11 nemendur veikir í bekknum mínum og 5-8 hina daga vikunnar. Frekar skemmtilegt. Ég er líka búin að vera með kennaranema, í dag voru þrír kennaranemar með 12 nemendur vegna veikindanna. Lúxus kennsla - 4 nemendur á mann! Ég er búin að vinna í rannsókninni fyrir Sólveigu, tók nokkrar hjá mér og nokkra í 5. bekk. Það gekk svosem ágætlega en ég sé ekki tilganginn með þessu verkefni. Sjálfsagt bara til að hjálpa kennaranum að afla gagna. Ætla að hitta Elísabetu á eftir og við ætlum að hjálpast að við að kóða og koma þessu frá okkur. Ætla svo að reyna að ná upp hvíld um helgina - ég er alltaf hálf syfjuð þegar líður á daginn og hef þurft að leggja mig. Best að koma sér heim í helgarfrí.

2003-03-25T11:08:00.000Z

Ég er komin heim. Guði sé lof. Ég hefði ekki meikað klukkustund enn. Það er svo gott að koma heim. Ekki að það hafi ekki verið fínt, en það er bara meira en að segja það að vera inná öðru fólki og algjörlega uppá það komin með þrjú vel hress börn, allt á fullu, snúa sólarhringnum við og allt það. Svo glumdi helvítis stríðið í eyrunum á manni allan sólarhringinn. Það er búið að aflýsa dagskrá á helstu sjónvarpsstöðvum og það eru fréttir allan sólarhringinn. Föðurlandsfréttir - mig langaði að grýta sjónvarpinu út um gluggann!

Ég mætti í vinnuna beint úr vélinni og háfskrítin núna - búin að vaka í sólarhring og þarf að tóra enn. Sé rúmið mitt og sængina í hyllingum. Las tölvupóstinn frá Láru um mat á frammistöðu minni og það fór afar vel með sjálfsmyndina. Það er gaman að leggja á sig og ná einhverjum árangri. Er að vinna í rannsókninni hjá Sólveigu, spjallaði við nokkra nemendur áðan og lét þau fá bre´f til að fara með heim. Er búin að finna tíma sem ég get notað til að "horfa" á þau. Vindi mér í það á morgun, fimmtudag og föstudag. Vona að það gangi upp og ég sé ekki að klúðra einhverju - heilinn í mér er ekki vel starfhæfur í dag. Þarf að ná upp svefni ogkoma mér aftur í form.

2003-03-22T18:00:00.000Z

Nu er eg stodd i nagrenni Minneapolis med fjallafjolskyldunni. That var ekkert mal ad komast her inn - ekkert aukid eftirlit vegna stridsins. Hins vegar er ekkert i sjonvarpinu vegna stridsins - allir dagskrarlidir snuast um stridsfrettaflutning. Hef ekki hitt neinn enn sem er hlynntur stridinu. Forum I Camp Snoopy i Mall of America, i budir og fleira.

2003-03-19T13:11:00.000Z

Þá styttist! Ég (og öll fjallafjölskyldan) er að fara til Minneapolis á morgun. Gat náttúrulega ekki valið betri tíma - kannski að Saddam sprengi okkur í loft upp eða kannski dvel ég í 2 daga á flugvellinum að komast í gegnum eftirlitið. Það hlýtur að verða ansi skrautlegt. Synir mínir, sem aldrei verða veikir, eru búnir að ver hund veikir af flensunni. Þeir voru reyndar hitalausir í morgun og ég vona það besta.´Er byrjuð að plana og kynna mér rannsóknina hennar Sólveigar og ætla að vinda mér í að "skoða" krakkana þegar ég kem heim á þriðjudaginn. Það verður ágætt að breyta um umhverfi og hugsa ekki um tölvumál ne skólamál í nokkra daga. Ég er að fara að heimsækja stjúpa minn og fjölskyldu hans. Ætla að fara með börnunum í tívolí og dýragar, versla svolítið og hafa það huggulegt.

2003-03-16T14:46:00.000Z

Tæknin ákvað að stríða mér ekki og þetta bara fór út á netið eins og ekkert væri. Er ansi sátt við frammistöðu mína í þessu verkefni - vonandi verður Lára það líka. Mér fannst þetta skemmtilegt verkefni, láta hugann aðeins reika og skerpa fyrir sér hvað það er sem maður hefur raunverulega áhuga á. Vísa annars í síðasta blogg ef verkefnið er ófullnægjandi á einhvern hátt. Hér kemur svo afraksturinn, fyrst á hinu ástkæra ylhýra; Áhugasvið UT og svo
enska útgáfan.

2003-03-16T12:24:00.000Z

Ég hef setið mjög sveitt við verkefnið hennar Láru um helgina. Komst reyndar að því snemma í gær að ég hafði misskilið verkefnið - held ég. Fattaði allt í einu þegar ég gáði betur að það væru einhverjar nánari leiðbeiningar og lesefni. Ég var byrjuð að semja þvílíkan pistil um mig og UT. Þetta reyndist ekki svo hræðilegt þegar upp er staðið þar sem margt af því sem þar var vísað til eru hlutir sem ég er að ræða í umfjöllun minni. Ég sé reyndar að fleiri eru svolítið óvissir um til hvers er ætlast, af þeim fáu sem ég sá að voru búnir að skila voru verkin mjög ólík og nokkrir nefna almennt áttunarleysi í bloggunum sínum. Ég er allavega orðin nokkuð sátt mitt verk og lagði bara nokkuð mikið í það. Það er reyndar asskoti langt finnst mér og skil því ekki hvernig ég ætti að geta kafað dýpra í nokkrar greinar líka án þess að síðan yrði all margar blaðsíður. Er alveg búin með íslensku útgáfuna og er að fínpússa ensku útgáfuna. Ég er nokkuð seig í ensku þannig að það er að skríða saman, það eru aðallega svona íðorð og heiti sem eru að "bögga" mmig eins og "fagstjóri" "fingrasetning" "fartölvuvagn" og "Menntagátt". Kemur bara tómahljóð í hausinn og ekki er betra hljóðið í orðabókinni. Vonast til að koma þessu út í dag. Vonandi fer tæknin ekkert að stríða mér.

2003-03-14T10:48:00.000Z

Nú var ég ansi óheppin. Kom aðeins í vinnuna í gær og kenndi nokkra tíma (tímdi ekki að sleppa vefsíðgerðartímanum!). Ég var búin að vera að vinna aðeins í síðunni minni heima, í verkefninu hennar Láru. Á meðan ég kenndi í tölvustofunni fór tæknimaður hússins að breyta einhverjum stillingum í tölvunni minni án þess að ég vissi af því. Svó í gær þegar ég var búin að koma mér í stellingar og ætlaði aldeilis að fara að vinda mér í verkið kom í ljós að ég komst ekki inn í eitt einasta skjal. Þessar breytingar höfðu haft þær afleiðingar að ég komst ekki inn á G-drifið þar sem öll gögnin mín eru geymd. Ég varð náttúrulega arga brjáluð og hringdi í manninn og hann reyndi að vera liðlegur en ekki var hægt að laga málið. Hann kíkti svo á þetta í morgun og fann bráðabirgðalausn sem dugir allavega til þess að ég get opnað á meðan ég er tengd við innanhúsnetið. Ég náði þ´vi í gögnin og setti þau á harða drifið og vonast til að geta unnið þetta verkefni heima í kvöld vandræðalaust.

2003-03-13T08:58:00.000Z

Hef verið heima núna í þrjá daga. Fékk smá snert af flensunni sjálf. Kom þó út fyrra verkefninu þ.e. UT fyrirlestrunum. Er búin að hugsa mikið um hitt verkefnið og skrifa slatta niður. Mér fannst þetta svo einfalt í fyrstu en þegar ég hugsa meira um það er það ekki svo einfalt - eða ég flæki það fyrir mér. Ætla að reyna að gera fyrstu drög að þessu verki í kvöld. Kannski maður ætti að senda það út og spyrja Láru hvort maður sé á réttri leið? Lífið ætti að komast í eðlilegt horf á morgun, ég er hitalaus og barnið hitalaust svo allir ættu vonandi að geta stundað nám og störf á morgun.

2003-03-11T16:13:00.000Z

Þetta er í fyrsta sinn sem ég fer á UT ráðstefnu. Mér fannst það ágætt á heildina litið. Þó fannst mér fyrirlestrarnir og málstofurnar ekki neitt sérlega spennandi fyrir mig sem grunnskólakennara. Skemmtilegast var að vera með öðrum kennurum og ræða skólamál. Það er alltaf gaman að ræða áhugamálið (þ.e. vinnuna) við aðra kennara og heyra hvað verið er að kljást við og prófa annars staðar.

Þeir fyrirlestrar og málstofur sem ég sótti á UT-2003 voru; Námsefnið á netið (Frosti Heimisson), Hugmyndasmiðja Menntagáttarinnar (Sigrún Eva Ármannsdóttir), Kennsluforritin “Glói geimvera lærir að lesa” og “Bogi blýantur og stærðfræðin” (Sylvía Guðmundsdóttir), Farsæl þróun UT í skóla – hvað þarf til? (Þór Jóhannsson) og E-learning in the modern society – Collaborative, Interactive and Open Standards (Mona Hakanson).

Ég ætla að segja lítillega frá Hugmyndasmiðju Menntagáttarinnar og Farsælli þróun UT í skóla – hvað þarf til?

Menntagáttin á að vera miðlægur gagnagrunnur þar sem hægt verður að nálgast upplýsingar um flest það sem snýr að menntun á Íslandi á einum stað s.s. upplýsingar um skóla, námskrár, greinar, verkefni o.s.fv. Ólíkt öðrum vefjum sem mikið eru notaðir (s.s. Ísmennt, Skólavefurinn) þá er Menntagáttin öllum opin og gjaldfrjáls.

Hugmyndasmiðja Menntagáttarinnar er gagnabanki þar sem hægt er að skrá inn kennsluhugmyndir, verkefni, kannanir og vefslóðir o.s.fv sem geta gagnast öðrum. Ef ég ætti t.d. gott gagnvirkt verkefni í bókmenntum fyrir 6. bekk á vefnum mínum gæti ég skráð það á Menntagáttinni. Annar kennari sem leitar að efni með þessum leitarskilyrðum á Menntagáttinni fær þá upplýsingar um þetta efni og getur notað það. Einnig er hugmyndin að flokka efni eftir tengingu við námskrá, þannig að ég get fundið efni sem hjálpar mér að ná ákveðnum markmiði í námskránni. Jafnframt verður starfandi ritstjórn sem fer yfir skráningar og metur efni sem skráð er.

Mér finnst hugmyndin að baki Hugmyndasmiðju Menntagáttarinnar afar góð. Hef reyndar lengi óskað eftir slíkum vef. Það fer allt of mikill tími hjá flestum íslenskum kennurum í að leita að efni eða búa til efni. Margir eru að búa til það sama, því flestir eru að kenna sama grunnefni og reyna að ná sömu markmiðum í námskrá. Það væri mikill vinnusparnaður fyrir alla ef slíkur gagnabanki yrði öflugur og hægt væri að spara sér endalausa verkefnagerð. En hugmyndin stendur og fellur með því hvort kennarar skrá efnið sitt. Margir vilja ekki skrá efni nema að fá greitt fyrir vinnuna sem liggur að baki. Ef engin skráir efni höfum við engan ávinning af slíkum vef og hann léttir okkur ekki vinnuna. Það verður áhugavert að sjá hvað verður. Ég hef verið að kíkja á vefinn og enn sem komið er hef ég ekkert fundið sem ég get notfært mér. Hef verið að hugleiða hvort ég eigi að skrá verkefni sem ég hef unnið og gætu nýtst öðrum.

Ég fór á “Farsæl þróun UT í skóla – hvað þarf til?” vegna þess að við í mínum skóla, Hofsstaðaskóla , höfum verið í mikilli og markvissri þróun í UT síðustu ár og held ég að við stöndum frekar vel að vígi. Því fannst mér áhugavert að heyra hvort við værum á réttri leið að mati fyrirlesara. Fyrirlesarinn, Þór Jóhannsson (Lói) er kennsluráðgjafi í UT við Grunnskólann á Borgarnesi og Grunnskólann í Varmalandi. Hann var aðallega að kynna fyrir okkur sitt starf (starfslýsingu) og sín sjónarmið varðandi þátt UT í skólastarfi og hvernig best megi ná markmiðum Aðalnámskrár í upplýsinga- og tæknimennt að hans mati. Einnig ræddi hann lítillega um hvaða “vandamál” koma upp í slíkri þróun. Flest af því sem hann sagði er í takt við það sem við höfum gert í Hofsstaðaskóla og voru greinilega sum viðfangsefnin af svipuðum toga og við höfum lagt fyrir okkar nemendur. Það sem kom mér helst á óvart var það að í skólanum er engin bundin tímasetning við tölvukennsluna. Þ.e.a.s. tölvutímar eru ekki á stundaskrá. Tölvurnar eru eingöngu notaðar eftir pöntun hvers kennara í tengslum við ákveðin viðfangsefni. Hjá okkur eru bundnir tíma í stundaskrá hjá öllum árgöngum, bæði til að kenna markvisst á tölvurnar s.s. word, excel, frontpage, ritþjálfa og einnig til að nota tölvurnar til þjálfunar og upplýsingaöflunar með notkun kennsluforrita og netsins o.fl. Við getum svo pantað tölvuverið eða fartölvurnar þar fyrir utan ef þörf er á við lausn stærri verkefna. Ég hefði viljað vita meira um það hvers vegna þessi leið var valin hjá þeim og hvernig hún hefur gefist. Ég held að hættan sé alltaf sú að sumir kennarar séu móttækilegir og þeirra nemendur séu mikið í tölvunum en aðrir hópar fái vart að snerta á þeim ef um val kennarans sé alfarið að ræða. Mér hefur allavega þótt gott að “verða” að læra á forritin og kennsluforritin og finna efni fyrir tölvutímana. Ef ég hefði átt val þá er alveg víst að ég hefði gert mun minna.

2003-03-11T13:14:00.000Z

Það er aldeilis að það rignir yfir mann verkefnum þessa dagana! Maður verður bara stressaður. Fögru fyrirheit mín um helgina fóru eitthvað í vaskinn. Gerði mest lítið af viti í náminu. Svo varð sonur minn veikur og ég hef verið hér hjá honum í stað þess að skrönglast í vinnuna. Maður er svo hræddur við þessa nýju flensu, ég þekki svo marga sem hafa legið með 40 stiga hita í heila viku. Ég er líka ekki alveg í stuði núna, þarf að vera alveg í rétta gírnum til að gera svona hluti. Læt þvottinn og klósettþrif lokka mig frá vefsíðuvinnu. Það er reyndar ágætt að fá svona aukadag í heimilisþrif, þyrfti að fá einn svoleiðis í hverri viku. Hef verið að hugleiða hvernig best sé að standa að þessum vef fyrir hana Láru. Finnst það frekar skemmtilegt verkefni - þarf bara að fá andann yfir mig. Ætli að reyna að leysa þetta tvennt að mestu í dag, tíminn flýgur og ég verð að koma mér í vinnuna á morgun. Hef líka aðeins verið að kíkja á bloggið hjá sumum í náminu. Kíkti m.a. á hjá Rannveiguog komst að því í hávísindalegu persónuleikaprófi að ef ég væri kaffi´, þá væri ég Latte. Gefið var í skyn að ég væri skapmikil og íhaldssöm og prufaði helst ekki nýjungar nema að vel athuguðu máli. Ja, hérna. Aðrir verða að dæma um það. Mamma hringdi líka í gærkvöldi og hélt langa tölu um einhvern snilldar miðil sem hún var hjá sem vildi líka meina það að ég væri skapmikil og frek. Hvað meinar fólk eiginlega - ég þetta hljóðlát ´ljúfmenni, skapmikil og frek, það skyldi þó aldrei vera. Ha, ha. Best að vinda sér í verkin.

2003-03-09T11:36:00.000Z

Sé að helmingurinn af því sem ég skrifaði á föstudaginn gufaði upp og það í miðri málsrein. Það sem ég ætlaði að segja var að ég bjó til síðu um fjölskylduna . Það gekk ekki alvega nógu vel. Ég bjó til nokkrar útgáfur af síðunni, ýmist með töflu eða með layers. Fékk hana ekki til að líta út eins og ég vildi. Finnst hún afleit. Pirrar mig að kunna ekki að gera það sem ég vil! Svo þegar ég mætti í vinnuna og ætlaði að kíkja á síðurnar mínar var allt komið í klessu, myndirnar dottnar út og allt í klessu. Mér tókst að redda því sem betur fer. Ég er greinilega eitthvað að gera rangt í ljósmyndavinnslunni. Þarf að fatta hvað það er. Ég setti líka inn fleiri krækjur og breytti síðunni minni aðeins. Ég lét svo nemendur mína gera vefrallýið um Garðaskóla sem ég bjó til og það gekk fínt. Síðan skellti ég mér á Flúðir á föstudaginn. Ein úr saumaklúbbnum mínum "Fjallhressu fílahjörðinni" tók upp á því að flytja þangað. Við skreppum víst ekki á Flúðir í saumaklúbb sísvona í miðri viku svo við höfðum helgarklúbb og fengum okkur í glas og gistum eina nótt. Ætla að reyna að vinda mér í að tjá mig um UT fyrirlestra í kvöld og útbúa sérstaka skilasíðu fyrir vefinn minn. Ætla að hætta í bili og vinda mér í önnur verkefni sem bíða.

2003-03-07T11:34:00.000Z

Jæja, ég var svolítið dugleg í gær líka. Ég fæ þetta samt ekki til að vera eins og ég vil. ÉG kann bara alls ekki nógu mikið og finn ekki hvernig ég á að gera ákveðna hluti eins og að bólstra töfluna eftir á og sitthvað smálegt. Bjó til

aðalsíðu og tæknisögu, vefrallý í lífsleikni og svo þetta nýjasta vefrallý um Garðaskóla. Í dag ætla ég svo að vinda mér í gera skilasíðu, breyta aðeins aðalsíðunni og setja inn síðu með myndum af gormunum mínum. Nú er ég komin á flugið! Mig langar líka að snúa mér að því að prufa að setja tag-board og teljara á bloggið mitt. Þarf að skoða hvort ég legg í það. Þori varla að eiga við þessa HTML kóða - hrædd um að allt detti út. ÞArf að fara að kenna uppáhaldstímann minn núna, Vefsíðerð í frontpage með 6. bekkingum. Gaman, gaman.

2003-03-05T10:33:00.000Z

Jæja. Nú er heilinn búinn að vera á fullu að pæla í alls kyns hlutum tengdum UT í skólastarfi. Margt af því hefur verið lengi að fæðast en er að skýrast í kollinum á mér. Snýr aðallega að hugmyndum fyrir næsta vetur. Þá fæ ég væntanlega nýjan bekk og vil breyta svolítið til. Mig langar að láta þau vinna meira efni á netið og einnig vinna á netinu þ.e.a.s. Ég ætla að reyna að láta þau vinna alls kyns sögur, ljóð o.fl. og birta það undir vef bekkjarins og vera dugleg að taka myndir af starfinu og birta á netinu þannig að foreldrar geti fylgst með. Svo hef ég gert svolítið að gagnvirkum verkefnum sem eru á netinu og ætla að gera meira af því og láta þau gera stundum slíkt heima í stað skriflegra verkefna eða beina þeim á ákveðnar síður á vefnum til að skoða/æfa sig. Mig langar líka til að læra á þetta Mediator forrit sem kynnt var á UT-2003 og nefur reyndar verið nefnt við mig áður. Þá getur maður búið til einföld forrit til að þjálfa það sem maður er að vinna hverju sinni. Það er ýmislegt hægt að gera þegar aðstæður eru góðar í tölvumálum eins og hjá okkur í Hofsstaðaskóla. Eini gallinn er að fagstjórinn í tölvu- og upplýsingatækni, Elísabet Benónýsdóttir, er í fæðingarorlofi og kemur ekki fyrr en í nóvember og nauðsynlegt er að hafa hana með í ráðum. Hún er afar dýrmætur starfskraftur og alltaf viljug að hjálpa manni. Ég er líka að spá í að setja slatta af verkefnum sem ég hef unnið í gegnum tíðina upp á vefnum mínum sem pdf skjöl svo aðrir geti notað þau en þau eru ábyggilega að nálgast þúsundið verkefnin sem ég hef gert um dagana. Margt af því er náttúrulega einnota rusl - en margt gott líka. Ég ætla að kíkja á nýja vefinn, Menntagáttina, og skoða hvort það er eitthvað sniðugt þar að finna. Mér finnst hugmyndin afar góð að einum sameiginlegum banka sem maður getur leitað í ef manni vantar verkefni eða vef. Hann stendur að vísu og fellur með því hvort við kennararnir erum tilbúnir að skrá gögnin okkar þar. Ég er að spá í að skrá gagnvirku verkefnin sem ég hef gert og eru á netinu. Verður maður ekki að sýna lít? (Þarf að setja krækjur á nokkrum stöðum úr þessum pistli inn á eftir)

2003-03-02T13:34:00.000Z

Jæja, þetta skilar´sér allavega eðlilega út á netið þótt þetta sé steypa hér á skjánum hjá mér. Ferlega skrítið - þarf að spyrja einhvern hvað í ísköpunum þetta getur verið. Þetta eru ekki einu sinni íslensku stafirnir eða eitthvað lógiskt- það koma bara kassar hér og þar. Hef ekki áhyggjur af því í bili ef þetta lítur eðlilega út.

2003-03-02T13:30:00.000Z

Það kom einhver villumelding og bull þegar ég ætlaði að pósta þetta. Vonandi er þetta bara einhverjir tímabundnir erfiðleikar hjá þeim á Blogger en ekki mótþrói í tölvunni minni.

2003-03-02T13:29:00.000Z

Heyrðu mig nú. Það er eitthvað steikt hér í tölvunni. Hér í textanum neðst á síðunni er bara tóm steypa, kassar og rugl. Ég var að skoða þetta á netinu og það leit allt eðlilega út þar. Hvað ætli sé um að vera? Hlýtur að vera einhver villa sem snertir mig ekki beint. Nema andinn í tölvunni hafi verið einmana meðan ég var á Akureyri og farið í mótmælaaðgerðir vegna vanrækslu. Blessuð tölvan hefur sjaldan verið ósnert í tvo sólarhringa.

Það var fínt að skella sér á Akureyri. Alltaf skemmtilega að hitta aðra kennara og ræða málin. Skemmtilegt fólk með okkur í náminu og í rútunni. Fannst nú dagskráin ekkert sérlega bitastæð í sjálfu sér. Ég fór á: Námsefnið á netið, Hugmyndsmiðja Menntagáttarinnar, Glóa geimveru og Boga blýant, Farsæl þróun UT-skóla - hvað þarf til og E-learning in the modern society - Collaborative, Interactive and Open standards. Ætla að tjá mig um það síðar t.d. þegar við eigum að gera verkefnið um það.

Best að vinda sér í "to do" listann sem bíður mín hér.

2003-02-27T14:09:00.000Z

Var rétt í þessu að senda út síðasta verkið sem ég átti eftir. Ætlaði að klára það heima í gær og fyrradag en nettengingin mín heima er eitthvað steikt svo ég náði ekki sambandi. Ætlaði að finna myndir og gera eitthvað "flott" en gat það ekki vegna tengingarleysis. Þarf að skoða það nánar þergar ég kem frá Akureyri að reyna að hressa uppá þessar síður mínar með smá myndum.

Hlakka til að fara til Akureyrar.

2003-02-24T14:01:00.000Z

Hvernig ætli þetta verði með rútuna á Akureyri. Myndi gjarnan vilja fá að vita hvenær er farið svo ég geti gert ráðstafanir. Ætli það sjáist á vef Kennaraháskólans? Annars prentaði ég út dagskránna og mér sýnist verða erfitt að velja. Það er svo margt á sama tíma. Ætli við megum velja að eigin vali eða verður okkur beint á ákveðna fyrirlestra? Hlýtur að skýrast í vikunni.

Elísabet skaut unganum út í gærkvöldi. H'un var með smá pílur þegar ég fór frá henni um 7 leitið og hann var fæddur kl. 23:22. Hann vildi bara bíða og gefa mömmu sinni bestu konudagsgjöf sem völ er á. Hann var stór og myndarlegur og allt gekk vel. Þannig að hún vonandi heldur sig frá tölvunni á næstunni.

2003-02-23T20:40:00.000Z

Hef setið aðeins við um helgina og skoðað málin milli þess sem ég hef verið að sinna fjölskyldunni. Það gekk að mestu átakalaust fyrir sig. Kom tæknisögunni út. Ég ákvað að setja hana bara upp í einfalda töflu sem hefði sömu liti og persónulegi vefurinn svo allt tóni saman. Það var samt eitthvað pikles varðandi það að koma þessu út. Ég vissi ekkert hvað væri að svo ég skellti mér til Elísabetar og hún kíkti á þetta. Veit ekki hvað ég myndi gera án hennar í svona vandamálum. Það virðist sem eitthvað hafi verið að því að hafa möppuna með vefnum á G- drifinu á tölvunni. Svo við eyddum öllu og settum allt aftur á C- drifið og þá virkaði þetta áfallalaust. Ætla að reyna að koma vefrallýinu út á morgun. Vonandi gengur það vel. Ég held að vefurinn sem ég er með sé það sem átt er við með persónulegum vef, þannig að þá þarf ég að vinda mér í sérstaka skilasíðu. Óneitanlega óx sjálfstraustið mikið í dag þegar mér tókst að gera síðuna án vandkvæða. Ég hafði látið þetta vaxa mér svo í augum.

2003-02-21T20:46:00.000Z

Jæja, þá er föstudagskvöld, ég í eins dags vetrarfríi og hreint ógeðslegt veður búið að vera. Ætla að koma sjálfri mér aftur almennilega í gang um helgina. Er búin að prenta út þessar halfmana leiðbeiningar frá Salvöru og ætla að leggjast yfir málin. Það er alltaf eitthvað sem dregur mann frá verkinu ef maður er ekki þeim mun staðfastari. Er t.d. að fá kennaranema í vikunni og þarf að sinna því eitthvað. En ég á ýmislegt óunnið sem ég á að skila 1. mars og ekki skila ég því í rútunni á leiðinni á Akureyri, þannig að nú er að skikka sig til að sitja við.

2003-02-18T11:25:00.000Z

Hef verið löt að skrifa. Annars sýnist mér að síðast bloggið mitt sé "gufað upp". Verð að standa mig betur. Hef lítið verið að spá í þessu núna. Er á þessu skeiði þ.s. ég tel sjálfri mér í trú um að ég geti þetta alls ekki og þetta sé of erfitt. Hef lítið verið að spá í þessu. Hef þó látið nemendur gera vefrallý. Ég fer í vetrarfrí um helgina. Kannsli ég noti tímann og reyni að vinna markvisst í þessu. Hvernig var það - var Kennó dagur á laugardaginn? Þarf að komast yfir þennan þröskuld og vinda mér meira í verkin - þetta hefst allt - ef maður gefur sér bara tíma.

2003-02-10T15:07:00.000Z

Ég hef bara ekki komið mér til að skrifa síðustu daga. Er oft að hugsa um það - en tengingin heima er svo leiðinleg og dagarnir í vinnunni eru búnir áður en ég veit af. Hef svosem lítið verið að pæla. Aðeins verið að skoða "tutorial" við forritin, en er ekki viss um að ég hafi lært mikið. Þarf að vinda mér í að setja upp eitthvað. Ætlaði um helgina uppí Kennó - komst aldrei svo langt. Ætla að fara næst þegar verður. Lét nemendur mína prufa vefrallýið sem við Elísabet sömdum saman og hún er búin að setja upp á síðunni sinni. Þeim fannst það skemmtilegt. Kannski að ég reyni að drullast itl að setja hitt upp.

2003-02-04T10:22:00.000Z

Eftir að ég lauk við að koma frá mér skylduverkunum um helgina ákvað ég að prufa að skella mér markvisst í að skoða forritin. Ég ákvað að prufa að vinda mér í "tutorial" pakkann sem fylgdi með. Ég er búin að sitja marga klukkutíma yfir því að gera nákvæmlega það sem er útlistað í Fireworks tutorialinum - en ég lærði líka fullt. Þetta er ekki eitthvað sem allir hafa þolinmæði í og misjafnt hvað fólk er vel statt í kunnáttunni. En mér fannst ég algjörlega "lost" svo ég ákvað að gera þetta og´sé ekki eftir þeim tíma. Er að hugsa um að vinda mér´líka í tutorial í Dreamweaver og sjá hvernig hann er. Ágætt að vita eitthvað áður en maður reynir að hanna eitthvað og allt fer í klessu. Er líka að reyna að finna skipulagða leið til að skoða bloggið hjá hinum. Það er nokkuð skemmtilegt að lesa um fólkið - fjölbreyttur og áhugaverður hópur.

2003-02-02T12:38:00.000Z

Jæja, þá telur maður sig vera búinn að afgreiða skylduverkin. Ekki gekk það nú þrautalaust fyrir sig. Vefurinn minn fór út í gær. Það gekk ágætlega að koma honum í "loftið" en af einhverjum ástæðum vildi myndin af mér ekki fara með. Ég reyndi aftur í dag að gera allt sem mér og "bjargvættinum" mínum (Elísabetu) datt í hug, við unnum myndina aftur, sendum þetta mörgum sinnum, hentum öllu út og fluttum inn aftur - en myndina vill netið ekki sjá. Kannski maður sé bara ekki nógu fríður? Nei, í alvöru, maður getur orðið helvíti pirraður á svona tæknibrasi sem maður skilur hvorki upp né niður í. Við lögðumst líka í að vinna vefrallý. Við unnum hugmyndirnar og spurningarnar saman, það var engin sem nefndi að það væri bannað, og tókum þær svo heim og ætlum að reyna að æfa okkur í Dreamweaver með því að setja þær upp og reyna að koma þeim út. Upphaflega hugmyndin fór í vaskinn - þ.e. kynþroskinn - lítið hægt að finna um það sem er við hæfi barna. Þá ákvaðum við að gera smá lífsleikni verkefni sem tengist á vissan hátt mjög skemmtilegu verkefni sem ég bjó til í vetur. Annað vefrallýið kynnir fyrir þeim Leit.is og skoðar flipana þar efst á síðunni. Í hinu vefrallýinu látum við þau versla á netinu fyrir ákveðna fjárhæð. Við erum jafnvel að velta því fyrir okkur að gera smá "pakka" af svona einföldum verkefnum tengd lífsleikni þar sem við kynnum þeim helstu vefi sem maður notar í daglegu lífi s.s. þjóðskrá, símaskrá, banka, bókasöfn o.s.fv. Svo ætla ég líka að gera rallý um Garðaskóla þ.s. mínir nemendur hefja nám þar næsta vetur og því er ágætt að láta þau skoða vefinn og kynna sér skólann. Vefurinn er víst í endurskoðun og því ætla ég aðeins að bíða eftir nýju útgáfunni. Best að halda áfram með verkið og sjá hvernig gengur að klóra sig fram úr því að koma einu vefrallý á koppinn.

2003-01-31T10:15:00.000Z

Elísabet (kennsluráðgjafi í tölvu- og upplýsingamennt) var að renna í hlað og tilkynna mér það að það er eitthvað pickles með tenginguna okkar og gengur ekki að senda út vefina. H'un ætlar að ræða við tæknifólkið og reyna að finna út úr þessu. Gott að hafa svona fólk til að "bjarga" sér.

2003-01-31T10:07:00.000Z

Góðan dag. Ég var með tölvutíma áðan og skellti mér í að prufa eitt vefrállý. Ég hef aldrei gert það áður. Vissi ekki að það væri til. Hafði heyrt um vefleiðangra en ekki vefrallý. Ég skoðaði flest vefrallý af námskeiðinu hjá Salvöru í fyrra og valdi það sem mér leist best á. Það var um uppfinningar og byggðist að mestu upp á vísindavefnum. Það var mjög skemmtilegt og nemendur mjög áhugasamir. Ég hef ekki staðið mig nógu vel í því að þjálfa markvissa upplýsingaleit á netinu og þetta er greinilega einmitt það sem mig vantaði til þess. Ætla að gera meira af þessu. Kíkið endilega á þessi verkefni frá því í fyrra.

2003-01-30T23:01:00.000Z

Jæja, ég er búin að liggja aðeins á netinu og reyna að finna efni fyrir vefrallýið mitt. Það gengur ekki sérlega vel. Það er heilmikið til um kynþroska laxa og fiskistofna .. en það dugar víst ekki. Kannksi verð ég að láta mér detta eitthvað annað í hug. Svo er að reyna að koma vefsíðunni út. Hef ekki grænan hvernig við áttum að fara að því. Þarf að klóra mér eitthvað í skallanum yfir því. Ætla að melta framtíðarsýnina til morguns - kannski dreymir mig eitthvað snjallt. Gott í bili.

2003-01-30T21:33:00.000Z

Tæknin og heimilisfólkið

Sennilega er ég hvorki mjög nýjungagjörn né mikill tæknisinni, svona fyrir utan tölvuna. Nemendum mínum þótti ég t.d. afar skrítinn í upphafi kennsluferilsins þ.s. ég hafði ekki bílpróf (tók það 28 ára) og var án sjónvarps í 10 ár. Á núna gamlan bíl, gamalt sjónvarp, hálfdapurt myndbandstæki og þennan nauðsynlegasta staðalbúnað á heimilin. Ég á ekki GSM síma og vil ekki eiga GSM síma en verð sennilega að fá mér hann innan fárra ára til að geta verið sítengd við börnin. Berst gegn því eins lengi og ég get. Mig langar í stafræna myndavél, en hef ekki fjárfest í henni ennþá. Fékk mér venjulega internettenginu þegar ég byrjaði í náminu í haust en hún dugar engan veginn svo mitt næsta verk er að skella mér á ADSL svo þetta gangi eitthvað hraðar. Við þurfum að vinna svo mikið á vefnum núna Það er til gömul leikjatölva á heimilinu sem synirnir nota. Gamla PC tölvan varð veik og gaf upp öndina í fyrra og við höfum ekkert reynt endurlígunartilraunir þ.s. ég hef fartölvuna og þarf ekki á hinni að halda. Er samt að hugsa um að láta kíkja á hana og leyfa strákunum að eiga hana. Fékk mér reyndar uppþvottavél og þurrkara þegar við fluttum fyrir tveimur árum og þvílíkur vinnusparnaður! Tækin eru góð ef þau gera manni lífið einfaldara, ekki satt?

2003-01-30T21:22:00.000Z

Hvað kann ég núna? Hvernig nota ég tölvuna?

Núorðið skil ég betur þetta drifa og möppusystem og fæ ekki taugaáfall yfir því að verkin mín “gufi upp”. Ég kann töluvert í ritvinnslu, eitthvað í Publisher, Excel og Power Point. Kann á einhver kennsluforrit sem ég hef þurft að nota í kennslunni. Ég kann að taka stafrænar myndir og setja þær inn á vélina og vinna aðeins í þeim. Ég kann að nota netið til að afla upplýsinga, en geri þó ekkert sérstaklega mikið af því. Ekki mikill netverji. Ég kann að nota tölvuspóst og geri það mikið. Bæði fyrir mig sjálfa til að halda tengslum við vini og vandamenn hér heima og erlendis, en einnig í vinnunni. Mér finnst mjög gott að nota tölvupóst til að eiga samskipti við foreldra. Sumum foreldrum sendi ég línu mörgum sinnum í viku. Afar þægilegt til að koma upplýsingum á framfæri án þess að lenda alltaf í hálftíma samtali. Í fyrra lærði ég að nota forritið “Hot potatoes” og eyddi miklum tíma í að búa til verkefni í því. Hér sést dæmi Gagnvirk könnun í Landnámi Íslands). Það reyndist skemmtileg ný vídd í kennslunni og reyndust foreldrar og nemendur mjög hrifnir af slíkum verkefnum. Í haust var svo ákveðið að ég ætti að kenna 6. bekkingum vefsíðugerð. En ég hafði aldrei búið til vefsíðu og kunni ekkert í vefsíðugerð. Fékk smá einkakennslu hjá kennsluráðgjafanum og viti menn – það er ógeðslega skemmtilegt að kenna vefsíðugerð og hefur gengið vel. Viljið þið sjá dæmi? Það má segja að ég kunni á tölvur það sem ég hef þurft að læra til að gagnast mér í starfi. Öll tæknileg atriði eru kínverska fyrir mér. Þegar menn eru að tala um tengingar og FTP; ADSL, Megarið o.s.fv. þá kemur bara tómahljóð í hausnum á mér. HTML er bara bull í mínum huga. Hef bara ekkert þurft að pæla í svoleiðis hlutum. Ég fékk bara þessa fínu tölvu í vinnunni, með öllum búnaði og forritum, allt tilbúið til notkunar og ég hef aldrei þurft að spá í slíkt. En ég elska tölvuna mína og nota hana mjög mikið. Fyrir sjálfa mig, fyrir vinnuna og einnig kenni ég á hana.

2003-01-30T14:18:00.000Z

Við stöllur tvær úr Hofsstaðaskóla ætlum að hittast aftur á eftir og vinda okkur í að gera drög að vefrallý. Ég fékk strax hugmynd af verkefni sem við gætum unnið - verkefni sem mig vantar einmitt núna og myndi þá nota sjálf. Við getum gert það saman vegna þess að við vorum að spá í að gera eitt fyrir stelpur og eitt fyrir stráka. Hins vegar gengur mér ekki mjög vel að leita að aðgengilegu efni á netinu um það sem við viljum skoða þ.e. kynþroskinn. Þetta sjálfsagt hefst allt saman. Er líka að hugsa um að fjárfesta í einhverri grunnbók um forritin sem við eigum að læra á.

2003-01-30T14:14:00.000Z

Ég og tölvan - framfarir

Ég hóf störf við Hofsstaðaskóla í Garðabær árið 1995. Í Garðabæ voru nokkrar tölvur á vinnuherbergi kennara til afnota. En þær voru allar PC. Svo ég þurfti að venja mig aftur á þær. Þá var reyndar komið Windows (ef ég man rétt) sem gerði manni lífið léttara eftir að hafa vanist gluggaumhverfi Makkans. Mér fannst þetta samt heldur flókið til að byrja með, skildi ekki öll þessi drif og möppur og þess háttar. En ég gat notað tækið til þess sem ég þurfti að gera og vann mikið að verkefnum á þessar tölvur en vann líka áfram á Makkann minn heima. Mér fór smátt og smátt fram í ritvinnslukunnáttunni, lærði að setja inn töflur og nota “drawing” stikuna til að setja kassa og ýmislegt þess háttar. Kunnátta mín var ennþá bundin við ritvinnslu í Word og Works (Machintosh).

Árið 1999 var sett á stofn tölvunefnd við grunnskóla Garðabæjar til að móta stefnu í tölvu- og upplýsingatækni í skólum bæjarins. Það hafði ýmislegt í för með sér . Í fyrsta lagi fékk ég, og allir kennarar bæjarins, nýja og fullkomna fartölvu til eigin afnota. Hlutur tölvukennslu í skólanum var aukin auk þess sem allir bekkjarkennarar áttu að kenna tölvutíma í stað sérstaks tölvukennara áður. Samhliða þessari innreið fengum við ýmis námskeið til hjálpa okkur að læra betur á tölvur og gera okkur hæfari til að kenna á þær. Jafnframt fengu allir skólarnir tölvuumsjónarmann og kennsluráðgjafa í tölvu- og upplýsingatækni til að leiðbeina okkur.

Frá þeim tíma hefur mér farið mikið fram. Ég hef farið á ýmis námskeið og lært ýmislegt sem ég nýti mér auk þess sem það er ómetanlegt að hafa góðan aðgang að kennsluráðgjafa til að leiðbeina manni ef þörf krefur. Ekki sakar að við erum góðar vinkonur og þvi hef ég “notað” hana meira en margur og lært heilmikið af henni. Núna kann ég fleira en ritvinnslu.

2003-01-29T15:38:00.000Z

Ég er búin að vera að melta með mér þessa tæknisögu. Þegar ég settist svo niður við skriftir þá hafði ég heilmikið að segja og þetta varð helst til langt. Þannig að ég ætla að birta hana í áföngum og fyrsta hlutann í dag.

Ég og tölvan – fyrstu skrefin.

Ég var sennilega nokkuð ung þegar ég komst í kynni við tölvu í fyrsta sinn. Stjúpfaðir minn var tölvuverkfræðingur og starfaði hjá Samskiðtadeild Varnarliðsins við að gera við risavaxnar tölvur sem þöktu heilu herbergin. Mér fannst þær stórmerkilegar. Þegar PC tölvur byrjuðu að koma á markað þá kom hann með slíkar heim og reif þær í sundur og grúskaði í þeim á allan mögulegan hátt. Svona hreinræktaður eðal tölvunörd – mjög snjall náungi. Hins vegar kom ég aldrei nálægt þessum tölvum og gerði ekkert í þeim. Það voru engin leikir og ekkert Internet í boði þá. Þetta var á árunum 1978-1982. Hann gaf mér reyndar fyrstu alvöru leikjatölvuna sem kom á markað (held ég), hún hét Atari og var ég ansi seig í Pacman og fleiri leikjum síns tíma.

Ég snerti sjálf fyrst á tölvu á einhverju agnarlitlu námskeiði í Fjölbrautaskóla Suðurnesja árið 1985 eða 1986. Þá hafði skólinn nýlega eignast örfáar Apple IIe tölvur og allir þurftu að fara á eitthvert frumstætt námskeið í Basic forritun. Ef ég man rétt vorum við 8 tíma eða svo og gerðum eitt lítið forrit sem lét tölvuna leggja saman tölur eða eitthvað í þá veruna. Fremur gagnslítið.

Þegar ég lauk stúdentsprófi 1987 tók ég mér hlé frá námi og starfaði hjá Varnarliðinu í 2 ár (1987-1989). Þá voru tölvur að hefja innreið sína þar og þurfti ég að vinna öll bréf og samninga og slíkt í ritvinnslu á Apple IIe tölvu skrifstofunnar. Mér fannst það strax mjög skemmtilegt.

Þegar ég byrjaði svo í Kennó 1989 var ekki mjög mikið um tölvur til að byrja með. Við skiluðum mörgum verkefnum handskrifuðum, en þegar um stærri verkefni var að ræða fékk maður að nota tölvur hjá ættingjum sem voru svo “ríkir” að hafa fjárfest í slíku tæki. Kunnáttan var takmörkuð, slá inn texta, bold og underline. Það var það eina sem maður kunni að gera. Ég man að aðalhöfuðverkurinn voru vistunarmál. Maður var alltaf svo hræddur um að gögnin “hyrfu” og maður þyrfti að gera allt uppá nýtt.

Síðasta árið mitt í Kennó voru keyptar all margar nýjar og flottar Machintosh tölvur á gagnasmiðju Kennaraháskólans. Maður vandist því að nota þær og fannst þær miklu notendavinsamlegri en þessar venjulegur PC sem maður hafði notað hingað til. Maður hafði ekki þessar miklu áhyggjur af því að gögnin “hyrfu”. Ég keypti mína fyrstu tölvu á námsmannatilboði um jólin 1991 til að nota við smíði á lokaritgerðinni. Það var Machintoch Classic. Hún var afar lítil og vinsamleg og þjónaði mér vel án nokkurra vandkvæða í nokkur ár.

Þegar ég hóf störf í Myllubakkaskóla að námi loknu voru þar einnig notaðar Machintosh tölvur og voru nokkrar slíkar á vinnuhebergi kennara. Ég framleiddi reiðinnar býsn af verkefnum á þessum árum á þessar tölvur, ásamt prófum og vikuáætlunum o.fl. Kunnáttan var ennþá algjörlega bundin við ritvinnslu en ég var orðin aðeins betri í henni og kunni fleiri skipanir.

2003-01-27T19:34:00.000Z

Ég átti víst að gera örlitla grein fyrir sjálfri mér. Best að gera það áður en lengra er haldið.

Ég fæddist í Reykjavík árið 1967 og er því 35 ára gömul. Þriggja ára fluttist ég til Bandaríkjanna og bjó þar í nokkrum fylkjum til 11 ára aldurs. Þá fluttist ég á Suðurnesin og bjó lengst af á hinum ýmsu stöðum í Keflavík. Lauk þar stúdentsprófi frá FS 1987. Tók mér hlé frá námi í tvö ár og starfaði hjá Varnarliðinu við skrifstofustörf. Fluttist til Reykjavíkur á meðan ég stundaði nám við Kennaraháskólann og fluttist svo aftur suður og hóf störf við kennslu þar. Fluttist til Hafnarfjarðar 1995 og bý þar enn ásamt sambýlismanni mínum, Þórarni, og þremur sonum, Stefáni og Kristjáni (tvíburar fæddir 1995) og Þórarni jr. (fæddur 1997).

Ég útskrifaðist úr Kennaraháskólanum 1992 og fluttist þá aftur til Keflavíkur og kenndi við Myllubakkaskóla þar í bæ í 3 ár. Var þar umsjónarkennari í 2.-6. bekk. Hóf störf við Hofsstaðaskóla í Garðabæ að loknu fæðingarorlofi árið 1996 og hef starfað þar síðan. Þar hef ég aðallega verið umsjónarkennari í 4.-6.bekk, en einnig árgangsstjóri, fagstjóri í íslensku og ensku. Í ár er ég umsjónarkennari í 6. bekk, tölvukennari 6. bekkja og fagstjóri í ensku.

Það var fyrir algjöra tilviljun að ég endaði sem kennari. Ég ákvað eitt sinn þegar ég var í námshleí að loknu stúdentsprófi að fara í svona áhugasviðs könnun (eða hvað þetta heitir) hjá Ábendi þ.s. það var svo óskaplega margt sem ég gat hugsað mér að læra. Niðurstöður þeirrar könnunar gáfu mjög ákveðið til kynna að kennsla væri draumastarf fyrir mig. Svo ég bara skellti mér í Kennó pg ´se svo sannarlega ekki eftir því. Mér finnst óskaplega skemmtilegt að kenna og vildi helst ekki gera neitt annað.

Best að láta þetta nægja í bili.

2003-01-27T19:11:00.000Z

Jæja, ég sat í þó nokkrar klukkustundir í gær, klóraði mér í skallanum og reyndi að fá einhvern botn í það hvað ég ætlaði að gera. Mér fannst þetta ekkert óyfirstíganlegt á námskeiðinu. En ég skipti snarlega um skoðun. Það virðist sem það hafi farið inn um eitt og út um hitt. Var ansi ráðvillt og hreint helvíti pirruð þegar á leið. Á endanum sá ég að ég þyrfti að byrja á því að lesa mér betur til, lesa lexíurnar sem nefndar eru í póstinum og fara jafnvel í gegnum einhverja af "tutorial" pökkunum í forritinu. Þetta kemur allt saman, verst hvað 1. febrúar er skammt undan. En prófin eru allavega búin. Lauk vitnisburðum í dag og svo eru foreldraviðtöl á miðvikudaginn og svo get ég setið endalaust yfir þessu og komist til botns í málunum.

2003-01-26T15:10:00.000Z

Nú er ég risinn upp úr prófum og slíku og ætla að fara að vinda mér í verkefni námskeiðsins af fullum krafti. Fyrsta verkið var að uppfæra svæðið mitt og nú ætla ég að reyna að skella inn eins og einni mynd. En ég er reyndar með aðstoðamann - svo þetta vonandi gengur.

2003-01-21T09:48:00.000Z

Jæja, þetta vill ekki virka ennþá. Mig klæjar í fingurna ég hlakka svo til að leggjast í þessi verkefni sem ég á að leysa. Þori ekki að demba mér í það strax þ.s. ég þarf að fara yfir fjall af prófum og ljúka vitnisburðum. Ég veit að ef ég byrja þá lít ég ekki upp í nokkra daga - svona þegar ég kemst á flugið. Er samt komin með hugmynd að verkefni til að gera í vefrallý og vefleiðangur. Þarf bara að leggjast í að sjá hvort eitthvað aðgengilegt efni er til á netinu til að vinna með.

2003-01-15T15:02:00.000Z

Jæja, skyldi þetta svo virka,

2003-01-15T14:35:00.000Z

Jibbííí. Nú get ég kvartað og kveinað um allt sem mig langar og varpað því út í netheima. Vonandi hafa fáir áhuga á því að lesa það sem frá mér kemur. SKynsamlegt væri að halda sig við að tjá sig um fagleg málefni...